Ціханоўская: «Падобныя выпадкі крычаць пра тое, што медыцына ў краіне патрабуе неадкладных зменаў»

— Я глыбока шакаваная трагедыяй, што адбылася ў Ельску. 14-гадовая дзяўчынка, якая звярнулася па медыцынскую дапамогу, так і не вярнулася дадому. У бальніцы не знайшлося патрэбных спецыялістаў, іх выклікалі з іншых гарадоў, але, на жаль, выратаваць падлетка не ўдалося, — адзначае нацыянальная лідарка.

Гэтая страшная гісторыя паказвае праблемы сістэмы аховы здароўя ў Беларусі. Пацыенты ўсё часцей сутыкаюцца з недахопам спецыялістаў, лекаў, абсталявання, а калі адбываецца непапраўнае — з адсутнасцю адказнасці. Асабліва жудасна, калі ахвярамі становяцца дзеці. Замест клопату і падтрымкі сям’я дзяўчынкі сутыкаецца з ціскам, умяшаннем у прыватнае жыццё і спробамі ачарніць памяць пра дзіця.

Святлана Ціханоўская выказала шчырыя спачуванні сям’і загінулай дзяўчынкі.

— Падобныя выпадкі крычаць пра тое, што медыцына ў краіне патрабуе неадкладных зменаў: большай увагі да лекараў, большых выдаткаў на абнаўленне, большага клопату пра людзей. Але рэжыму прасцей замоўчваць праблемы ці перакладаць адказнасць на безабаронных грамадзянаў — і не шукаць выйсця з сітуацыі, — адзначае палітык.

Яна лічыць, што ў сілах беларусаў зрабіць, каб такія гісторыі не паўтараліся. А для гэтага важна «не даваць трагедыі растварыцца ў маўчанні» і дамагацца пільнага расследавання яе прычынаў.