Стала вядома, куды пайшоў на працу адстаўлены старшыня Следчага камітэта Іван Наскевіч

У снежні 2020 года Івана Наскевіча адправілі ў адстаўку з пасады старшыні Следчага камітэта.

Яго лічылі прадстаўніком ліберальнага крыла сілавікоў. Следчы камітэт пад кіраўніцтвам Наскевіча збіраў факты катаванняў на Акрэсціна. На адной з нарадаў Лукашэнкі з сілавым блокам ён нібыта нават заявіў пра наяўнасць матэрыялаў, дастатковых для завядзення крымінальных спраў аб перавышэнні паўнамоцтваў сілавікамі.

Аднак ходу гэтай ініцыятыве не далі. Па адной з версій, на гэтым моманце тагачасны міністр унутраных спраў Юрый Караеў заявіў, што «калі хоць на аднаго супрацоўніка будзе заведзена крымінальная справа, то са шчытамі будуць стаяць супрацоўнікі Следчага камітэта».

Разам з тым лічыцца, што менавіта Наскевіч, спрабуючы даказаць сваю вернасць, прапанаваў ідэю заводзіць крымінальныя справы на абсалютна ўсіх удзельнікаў акцый пратэсту.

Ніякую іншую дзяржаўную пасаду ён так і не атрымаў. Як «Кіберпартызаны» паведамілі «Нашай Ніве», Наскевіч быў беспрацоўным да 2023 года, а пасля ўладкаваўся ў кампанію «Тэх энд Бізнэс Салюшэнс».

Гэта юрыдычная асоба кіруе холдынгам 1AK-Group, самы вядомы бізнэс якога — скандальны акумулятарны завод пад Брэстам.

Мясцовыя жыхары і грамадскасць былі катэгарычна супраць такой будоўлі. Дату запуску завода ўвесь час адкладалі з-за пратэстаў. Аляксандр Лукашэнка ў 2020-м асабіста абяцаў правесці мясцовы рэферэндум наконт акумулятарнага заводу. Аднак рэферэндуму так і не адбылося. Завод пачаў працу ў 2021-м.

Заснавальнік 1AK-Group — адзін з самых багатых людзей Пінска Віктар Лемяшэўскі. І для Наскевіча гэта відавочна не чужы чалавек.

Сам Наскевіч паходзіць са Столінскага раёна, але доўгі час быў пракурорам Пінскага раёна і Брэсцкай вобласці — рэгіёнаў, у якіх і робіць бізнэс Лемяшэўскі. А катэдж Наскевіча ў Пінску знаходзіцца праз дарогу ад дома Лемяшэўскага, яны суседзі.

Калі ж Лемяшэўскага ўрэшце арыштавалі ў 2018-м, то па лініі КДБ, а не Следчага камітэта (які на той момант ужо ўзначальваў Наскевіч). Бізнэсмен тады заплаціў выкуп і выйшаў на свабоду, але яму давялося падзяліцца і акумулятарным бізнэсам.

Цяпер Лемяшэўскі разам са сваім партнёрам Аляксандрам Папком валодае 40% акумулятарнага завода. Яшчэ 40% кантралюе набліжаны да Аляксандра Лукашэнкі Дзмітрый Баскаў. Рэшта засталася Брэсцкаму аблвыканкаму.

Якую пасаду займае ў «Тэх энд Бізнэс Салюшэнс» Іван Наскевіч, невядома.

***

Іван Наскевіч нарадзіўся 25 сакавіка 1970 у вёсцы Цераблічы Столінскага раёна. Скончыў Украінскую дзяржаўную юрыдычную акадэмію (1995) па спецыяльнасці «правазнаўства», Палескі дзяржаўны ўніверсітэт (2006) па спецыяльнасці «эканаміст», Акадэмію кіравання па спецыяльнасці «дзяржаўнае будаўніцтва».

У 1995—2015 працаваў у органах пракуратуры. У 2007—2012 — пракурор Пінскага раёна, у 2012—2015 — пракурор Брэсцкай вобласці. З лістапада 2015 па снежань 2020-га — старшыня Следчага камітэта. Пасля гэтага два гады (да 2023 года) Іван Наскевіч нідзе афіцыйна не быў уладкаваны.