Жонка беларускага ваеннага медыка, які загінуў ва Украіне, атрымала ўзнагароду ад Рады БНР

«Мы жывыя, пакуль памятаем! Мая памяць каштуе вельмі дорага, — напісала Аляксандра ў сацсетках. — На жаль, я і мая сям'я страцілі ў агні ўсе ўзнагароды нашага Міколкі.

Дзякуй за магчымасць атрымаць чарговую ўзнагароду ў памяць аб яго змаганні за нашу свабоду і свабоду сваёй радзімы».

36-гадовы Мікалай Ільін загінуў 13 ліпеня 2020 года каля акупаванай Горлаўкі (Данецкая вобласць) падчас эвакуацыі цела загінулага ўкраінскага байца.

Група ішла ў белых касках і з апазнавальнымі знакамі, была дамоўленасць аб спыненні агню. Праціўнік пачаў абстрэл эвакуацыйнай групы. Мікалай і яго калегі пачалі адыход, аднак аднаго з байцоў параніла і беларускі медык вярнуўся, каб аказаць яму дапамогу. Ільін загінуў, атрымаўшы раненні, не сумяшчальныя з жыцццём.

Ягоны прах быў развеяны ў трох краінах — ва Украіне, Беларусі і Эстоніі.

Гісторыю кахання Мікалая Ільіна і ягонай грамадзянскай жонкі — украінкі Аляксандры Боршч чытайце тут.